एक रात थियो भर्खरकै थियो
ऊसँग मेरो प्रीत
म मुस्काउँदथें ऊ लजाउँदथी
त्यो रात नै उजेलो थियो
म छेउ सर्दथें ऊ पर सर्दथी
त्यो भेट नै मौन थियो
केही भन्न खोजी ऊ अघि सर्दथी
तर बोली नै अल्पिदिन्थ्यो
केही भन्छ भनी म अघि सर्दथे
तर बोली नै अल्झिदिन्थ्यो
केही भन्न नपाई रात ढल्दै जाँदा
मन नमान्दै बिछोडिन्थ्यो
ऊ मेरै थिई म उसकै थिएँ
त्यो संसार नै अर्को थियो
प्राण धड्कँदथ्यो मन चञ्चल थियो
हर सुस्केरा कम्पित थियो
म हेरिदिन्थें ऊ झुकिदिन्थी
यो आँखाले के भन्दिन्थ्यो