गौंथली झैं यो गाउँमा
कसको मायाले—
भन ! तिमी आयौ
कुन घरको दलानमा गुँड लगाउँने
कसको खेतको पानी र माटो चलाउने
गौंथली झैं यो गाउँमा
तिमी गएदेखि नै– हिमाल रोइरह्यो
जून डुलेन, धान झुलेन
करेशाको लालुपाते फेरि फुलेन
दीयो बलेन, मादल बजेन
मान्छेदेखि मान्छे पुग्ने पुलै रहेन
यस्तो थाहा पायौ कि
कसको मायाले—
भन ! तिमी आयौ
गौंथली झैं यो गाउँमा
तिमी गएदेखि नै – गाउँलाई दशा लाग्यो
सह रहेन, शान्ति भएन
दाजु भाइ एक–अर्काको मनै मिलेन
दया रहेन, धर्म रहेन
आफन्तमा लड्दा लड्दै कोही रहेन
यस्तो थाहा पायौ कि
कसको मायाले—
भन ! तिमी आयौ
गौंथली झैं यो गाउँमा