चपला अबलाहरु एक सुरमा,
गुनकेसरिको फुल ली शिरमा।
हिडन्या सखि लीकन वरिपरी
अमरावति कान्तिपुरी नगरी।।

यति छन् भनि गन्नु काहाँ धनि याँ,
खुसि छन् बहुतै मनमा दुनियाँ ।
जनकी यसरी सुखकी सगरी,
अलकापुरि कान्तिपुरी नगरी।।

कहिँ भोट र लण्डन, चीन – सरी,
कहिँ काल्-भरि गल्लि छ दिल्ली - सरी।
लखनौं, पटना, मदरास – सरी
अलकापुरि कान्तिपुरी नगरी।।

तरबार कटार खुँडा खुकुरी,
पिसतोल र बन्दुक सम्म भिरी।
अतिशूर र वीर भरी नगरी,
छ त कुन्- सरि कान्तिपुरी नगरी।।

रिस राग कपट् छल छैन जहाँ,
तव धर्म कती छ कती छ यहाँ,
पशुका पति छन् रखबारि गरी,
शिवकी पुरि कान्तिपुरी नगरी।।