ल्याम्पपोस्टमुनि आगो तापिरहेछन्– नानीहरू
युगौंदेखि छ– जाडो

उहिल्यै त दाउरा बाल्थे रे ताप्न
बाल्थे रे– पानी र हावा

हामीले बाल्यौँ टायर भत्केका मिनिबसका
बाल्यौँ खबरकागज र राजनेताका पम्पलेट
आज नानीहरू बालिरहेछन्– धर्मग्रन्थका अन्तिम पृष्ठ
फिल्मफेयर र आधुनिक कविता
के बाल्लान् भोलिका नानीहरू ?
के बाल्लान् हँ.... ?!
युगौंदेखि छ– जाडो

ल्याम्पपोस्टमुनि आगो तापिरहेछन्– नानीहरू