भोकै मर्ने महाकविका पेटका सारङ्गीहरु
हाम्रा गीतहरू
नाङ्गै मर्ने गाइने दाइका झुत्रा लुगाहरू
हाम्रा गीतहरू
भित्ता र पर्खालहरूका
रेखा र रङगहरूका
मुटु ताछ्ने कथाहरू जस्ता टुहुरा चित्रकारहरू
हाम्रा गीतहरू
गल्ली गल्लीमा मिल्किएका
वास्ता नगरिएका बरु हेला गरिएका मूर्तिकारहरू
हाम्रा गीतहरू
क्रन्दन अनि क्रन्दनहरूसँग
जताततै छरिएका कविहरू
हाम्रा गीतहरू
नमर्दै पुरिएका तर जिउँदा चिहानका आवाजहरू
हाम्रा गीतहरू