Ek Sundari Veshya Prati - Bhushita Vasistha

म स्वप्निंदो छु उर्वशी, जिलाउँदो छु मेनका !
मलाई दिव्य कामिनीको तिर्सना अनन्त छ !
म मत्तमा ! म मस्तमा ! मलाई प्यास सुन्दर !
म अड्छु, फुल्छु, हेर्छु रे ! मनुष्य पुष्प फर्फर !
इशार, फुल्छ चित्त यो ! पुकार, चल्छ छाति यो !
म मासुको गुलाफको मिठास के गरी भुलौं ?
निसर्गको छ ऐन यो ! छ कृष्णलाई चैन यो !
समाधि–मग्न शम्भुको प्रकोपवादको खुशी !
म दीपको पतङ्गको उडान–निम्ति वार के !
यही त ब्रह्मपाश हो ! र बाँधिने मिठास हो !
यही चकोर प्यास हो ! हुनाको मात, आश हो !
म पौडिने तरङ्ग हो ! म मस्तिने सुवास हो !

‘सुटुक्क झट्ट आ !’ भनी रुमाल फर्फराउँछ्यौ ?
कटाक्ष तीक्ष्ण लाउँछ्यौ ? सवाल मौन ल्याउँछ्यौ ?
यहीं छ द्धार, देख्छु है ! ए पर्ख ! क्यै निरख्छु है !
म देख्छु छूत मृत्युको ! त्यो चोइटो खसेछ है !
यहाँ त मृत्यु देखिनै हुँदैन रे तिमी जहाँ !
न हाँस ! कालको कथा कता कता सुनिन्छ है !
तिमी नजीक काल के ? म काल साथ लड्दछु !
तिमी भिडाउ सुन्दरी ? म मृत्यु साथ भिड्दछु !
उषा थिइन्, जली मरिन् ! सुवर्ण–साँझ अल्पिइन् !
न आँशु हुन्, न तारका, वितान झल्झलाउँछ !
न देखिने खुँडा लिने मलाई क्यै सताउँछ !
ऊ चाल मार्छ सुस्तरी ममा प्रहार गर्न ए !

प्रसूनसाथ रोइनौ ? निशाग्र दृष्टि धोइनौ ?
र पुत्तली पखेरुका सुवर्ण–धूल छोइनौ ?
सुचारु साँझ जल्दथिन्, तिनी अगाडि रोइनौ ?
गलेर चाँदनी कणी, जली, ढली, थपोइनौ ?
म मार्छु मृत्यु सुन्दरी ! म क्रोधमा छु ! मार्न द्यौ !
विनाश चाल मार्छ रे ! म रोक्छु गर्व झर्न द्यौ !
म फूल झर्न दिन्न रे ! म रङ्ग उड्न दिन्न रे !
अहा ! यो मुस्कुरी पला अमोल हिँड्न दिन्न रे !
तँ वैंश ! अड् ! नमर् ! नमर् ! म गाउँला सदा ! सदा !
सुरा न सिद्धियोस् परी ! नशा भरी, र प्यास होस् !
तँ झ्यालको न नाश होस् ! तँ दृष्टि नित्य दास हो !
झकाइ, यो अटूट होस् ! तिमी, सदा निमन्त्रणा !

तँ चन्द्रमा ! कला नफेर् ! तँ मेघ हे ! नजा नघेर् !
तँ पोज बस् ! तँ ओठ जी ! ‘मुसुक्क !’ मर्त्यता नवर् !
तँ नूर हो स्थिरप्रभा ! यहाँ छ कामिनी–शिखा
धगध् धगध् ज्वलन्त जो, तँ चित्त ! नित्य धग्धगा !

निचोर सृष्टिकी तिमी सजीव कामिनी बन्यौ !
तिमी, ममा छ विश्वको त फ्याक, फ्याक रे मुटु !
तिमी, ममा छ विश्वको त फ्याक, फ्याक रे मुटु !
तिमी, म साथ चल्छ यो ! तिमी, म साथ फुल्छ यो !
हिमाल सम्झ पार्वती ! रसालकुञ्ज, राधिके !

अचम्म ! छौ बजारमा ? यहाँ कसोरि छौ तिमी ?
विशाल सृष्टि–वल्लरी प्रफुल्ल एक पुष्प ए ?
म सोध्छु ए ! विचित्रकी तरङ्ग ! वृत्ति–बावली !
मभित्र बज्छ बाँसुरी, मिहीन औ पुरानिया !

म पूर्ण आफु दिन्छु हे ! जुहारलाई ज्यान होस् !
मुहारलाई प्राण होस् ! मिटान निम्ति शान होस् !
म दिन्न अंशदान ए ! म सिंगुलै चढाउँछु !
नमाग यत्ति मात्र रे ! म आउँदो छु ! धाउँछु !
तिमी त सृष्टिधूलिका, मिले म विश्व रच्दछु !
विशाल सूनसान नै बसाउनेछु सुन्दरी !
कुँदेर चन्द्रखण्ड यो अपूर्व शिल्पकारले
छ मर्नु ! यत्ति मोलमा बिक्यौ भने प्रभावकारी !

बुझें ! बनेर व्यङ्ग्यकी विशालता तिमी बस्यौ
बजारमा समाजको, गिज्याइ आजको मुख ?
जहाँ छ साँढे स्वार्थको सुचारु पुष्प–भक्षक !
जहाँ छ राज्य मासुको र आँशुको जलाशय !
छ कीट लब्ध पुष्पमा ! विनाशसार प्यार छ !
ठगी, अपूर्व रुपको ! र नोटको बजार छ !
चुरो किनिन्छ मानवी ! गरीबमाथि मार छ !
जहाँ समाज नामको कुनर्कको मुहार छ !
समानता अजीव छन् जहाँ, र ढ्वाँग सार छ !
अहा ! बनेर व्यङ्ग्यकी प्रदीपिका तिमी जल्यौ !
तिमी मनुष्य–मातृका तिमी सुधा ! तिमी क्षुधा !
विशाल विश्वदीपिका ! तिमी तमोमयी तृषा ?

यो लात हो विरिञ्चीमा ! यो सृष्टिमाथि लाञ्छना !
निसर्गको प्रवञ्चना ! यो दागदीप आजको ?
विशाल व्यङ्ग्य, व्यङ्ग्य हो ! समाजको समाजको !
प्रकोप–मूर्छिता चिता ! कराल सुन्दरी तिमी !
निशुम्भ, शुम्भ डाक्तछयौ ? प्रचण्ड, चण्ड, मुण्ड के ?
लगाइ रुण्ड मुण्ड के ! छछम् ! छछम् ! धिधिक् ! धिधिक् !
धपक्क बल्न इच्छियौ ? जमीन डग्डगाउँदै ?
ए व्यङ्ग्य ! व्यङ्ग्य नै बनी गिलिल्ल, हाँस झ्यालमा !

Ma swapnindo chhu urwashi, jilaundo chhu menaka !
Malai diwya kaminiko tirsana ananta chha !
Ma mattama ! Ma mastama ! Malai pyas sundar !
Ma adchhu, phulchhu, herchhu re ! Manushya pushpa pharphar !
Ishar, phulchha chitta yo ! Pukar, chalchha chhati yo !
Ma masuko gulaphko mithas ke gari bhulau ?
Nisargako chha aina yo ! Chha krishnalai chaina yo !
Samadhi–magna shambhuko prakopawadko khushi !
Ma dipko patangako udana–nimti war ke !
Yahi ta brahmapash ho ! Ra bandhine mithas ho !
Yahi chakor pyas ho ! Hunako mat, aasha ho !
Ma paudine taranga ho ! Ma mastine suwas ho !

‘sutukka jhatta aa !’ bhani rumal pharpharaunchhyau ?
Kataksha tikshna launchhyau ? Sawal mauna lyaunchhyau ?
Yahi chha ddhar, dekhchhu hai ! E parkha ! Kyai nirakhchhu hai !
Ma dekhchhu chhut mrityuko ! Tyo choito khasechha hai !
Yaha ta mrityu dekhinai hundaina re timi jaha !
Na hansa ! Kalko katha kata kata suninchha hai !
Timi najik kal ke ? Ma kal sath laddachhu !
Timi bhidau sundari ? Ma mrityu sath bhiddachhu !
Usha thiin, jali marin ! Suwarna–sanjha alpiin !
Na aanshu hun, na tarka, witana jhaljhalaunchha !
Na dekhine khunda line malai kyai sataunchha !
Oo chal marchha sustari mama prahar garna e !

Prasunasath roinau ? Nishagra drishti dhoinau ?
Ra puttali pakheruka suwarna–dhul chhoinau ?
Sucharu sanjha jaldathin, tini agadi roinau ?
Galera chandani kani, jali, dhali, thapoinau ?
Ma marchhu mrityu sundari ! Ma krodhma chhu ! Marna dyau !
Winash chal marchha re ! Ma rokchhu garwa jharna dyau !
Ma phool jharna dinna re ! Ma ranga udna dinna re !
Aha ! Yo muskuri pala amol hindna dinna re !
Ta wainsha ! Ad ! Namar ! Namar ! Ma gaunla sada ! Sada !
Sura na siddhiyos pari ! Nasha bhari, ra pyas hos !
Ta jhyalko na nash hos ! Ta drishti nitya das ho !
Jhakai, yo atut hos ! Timi, sada nimantrana !

Ta chandrama ! Kala napher ! Ta megh he ! Naja nagher !
Ta poj bas ! Ta otha ji ! ‘musukka !’ martyata nawar !
Ta nur ho sthiraprabha ! Yaha chha kamini–shikha
Dhagadh dhagadh jwalanta jo, ta chitta ! Nitya dhagdhaga !

Nichor srishtiki timi sajiv kamini banyau !
Timi, mama chha wishwako ta phyak, phyak re mutu !
Timi, mama chha wishwako ta phyak, phyak re mutu !
Timi, ma sath chalchha yo ! Timi, ma sath phulchha yo !
Himal samjha parwati ! Rasalakunja, radhike !

Achamma ! Chhau bajarma ? Yaha kasori chhau timi ?
Wishal srishti–wallari praphulla eka pushpa e ?
Ma sodhchhu e ! Wichitraki taranga ! Writti–bawali !
Mabhitra bajchha bansuri, mihina au puraniya !

Ma purna aaphu dinchhu he ! Juharlai jyana hos !
Muharlai pran hos ! Mitana nimti shana hos !
Ma dinna anshadana e ! Ma singulai chadhaunchhu !
Namag yatti matra re ! Ma aaundo chhu ! Dhaunchhu !
Timi ta srishtidhulika, mile ma wishwa rachdachhu !
Wishal sunasana nai basaunechhu sundari !
Kundera chandrakhanda yo apurwa shilpakarle
Chha marnu ! Yatti molma bikyau bhane prabhawakari !

Bujhe ! Banera wyangyaki wishalata timi basyau
Bajarma samajko, gijyai aajako mukh ?
Jaha chha sandhe swarthako sucharu pushpa–bhakshak !
Jaha chha rajya masuko ra aanshuko jalashaya !
Chha kit labdha pushpama ! Winashasar pyar chha !
Thagi, apurwa rupko ! Ra notko bajar chha !
Churo kininchha manawi ! Garibamathi mar chha !
Jaha samaj naamko kunarkako muhar chha !
Samanata ajiv chhan jaha, ra dhwanga sar chha !
Aha ! Banera wyangyaki pradipika timi jalyau !
Timi manushya–matrika timi sudha ! Timi kshudha !
Wishal wishwadipika ! Timi tamomayi trisha ?

Yo lat ho wirinchima ! Yo srishtimathi lanchhana !
Nisargako prawanchana ! Yo dagadip aajako ?
Wishal wyangya, wyangya ho ! Samajko samajko !
Prakopa–murchhita chita ! Karal sundari timi !
Nishumbha, shumbha daktachhayau ? Prachanda, chanda, munda ke ?
Lagai runda munda ke ! Chhachham ! Chhachham ! Dhidhik ! Dhidhik !
Dhapakka balna ichchhiyau ? Jamina dagdagaundai ?
E wyangya ! Wyangya nai bani gililla, hansa jhyalma !